ताप्लेजुङ- पछिल्लो समय जिल्लामा कोभिड– १९ संक्रमण दर घट्दै गएको छ। हाल जिल्लामा सक्रिय संक्रमित १०० भन्दा कम छन्। प्रमुख जिल्ला अधिकारी उमेश पाण्डेका अनुसार पछिल्ला दिनमा संक्रमित हुने भन्दा निको हुनेको सङ्ख्या धेरै छन्।कोरोना विरुद्धको खोप, लामो समयसम्म जारी गरिएको निषेधाज्ञा र जनस्वास्थ्य मापदण्डका कारण संक्रमणको दर घट्दै गएको उनको भनाइ छ।
मंगलबारसम्म जिल्लाभर पिसिआर र एन्टिजेन परीक्षणबाट दुई हजार ४८७ मा कोरोना संक्रमण पुष्टि भएको छ भने निको हुनेको सङ्ख्या दुई हजार ३०० बढी छन्। यसैगरी जिल्लाभर ३४ हजार ८१५ ले कोभिड विरुद्धको पूर्ण खोप लगाइसकेका छन् भने पहिलो डोज मात्र लगाउनेको सङ्ख्या ३८ हजार ६७४ पुगेको छ। अहिले पनि १८ वर्ष माथिका विद्यार्थीलाई खोप लगाउने कार्यक्रम जारी छ।
संक्रमणको दर घटेसँगै गएको सोमबारदेखि निषेधाज्ञा हटाइएको छ। यस्तै पाथीभरा मन्दिरलाईसमेत खुलाइने तयारी भएको छ। तत्काल बैठक बसी दर्शनार्थीका लागि मन्दिर खुला गर्ने तयारी भएको प्रजिअ पाण्डेको भनाइ छ। रासस