नेपालगन्ज । पश्चिम नेपालमा पहिलोपटक क्यान्सरसम्बन्धी विशेषज्ञ चिकित्सकहरूको ठूलो जमघट हुने भएको छ। बाँकेको खजुरास्थित सुशील कोइराला प्रखर क्यान्सर अस्पतालले मस्कुलोस्केलेटल अनकोलोजी सोसाइटी अफ नेपाल (मोसन) नेपाल र नेपाल अर्थोपेडिक एसोसिएसन (नोए) वेष्टर्न च्याप्टरसँग मिलेर मङ्सिर २६ र २७ गते हड्डी, मांसपेशी र छालाका क्यान्सर विषयमा बृहत् गोष्ठी तथा चिकित्सक सम्मेलन गर्ने तयारी गरेको छ।
उद्घाटन सत्र खजुरामै हुनेछ भने कार्यपत्र तथा प्राविधिक सत्र नेपालगन्जमा सञ्चालन गरिने बताइएको छ।
आयोजक समितिका अध्यक्ष एमएसके अंकोसर्जन डा। गोपाल पौडेलका अनुसार बाँके तथा वरपरका जिल्लामा कार्यरत सर्जन, प्याथोलोजिस्ट, अर्थोपेडिक, रेडियोलोजिस्ट, मेडिकल तथा रेडियसन अंकोलोजिस्टलाई अस्पतालको सेवा, क्यान्सर उपचारका नयाँ अभ्यास तथा प्रविधिबारे जानकारी गराइनेछ। साथै चिकित्सकहरूले आफ्नो अनुभव, समस्या र समाधानबारे आपसमा खुला छलफल गर्ने अवसर पाउनेछन्।
भरतपुर, विराटनगर, काठमाडौँ, दाङ, सुर्खेत, कोहलपुर र नेपालगन्जका क्यान्सर विशेषज्ञहरू सम्मेलनमा सहभागी हुने तयारीमा छन्। अस्पतालका क्लिनिकल अंकोलोजिस्ट तथा सचिव डा। मुकेश यादवका अनुसार सम्मेलनमा करिब २ सय जना सहभागी हुने र ७ लाख रुपैयाँ हाराहारी खर्च हुने अनुमान छ।
पश्चिम नेपालमै पहिलोपटक आयोजना हुन लागेको यो कार्यक्रमले खजुरा क्यान्सर अस्पतालको सेवा चिनाउने, विश्वास बढाउने र चिकित्सकहरूलाई यहाँ बिरामी रिफर गर्न प्रेरित गर्ने अपेक्षा गरिएको छ। खजुरामा अत्याधुनिक क्यान्सर अस्पताल रहे पनि अझै धेरै बिरामी काठमाडौँ र भरतपुर जाने बाध्यता रहेकाले सम्मेलनले उपचार सेवा स्थानीय तहमा केन्द्रित गर्ने दिशामा सकारात्मक प्रभाव पार्ने विश्वास आयोजकहरूको छ।
-1764323961.jpg)
1699677933.jpg)
