काठमाडौँ। स्वास्थ्य तथा जनसङ्ख्या मन्त्रालयले आम नागरिकलाई उपलब्ध गराइने एम्बुलेन्स तथा शववाहन सेवालाई थप व्यवस्थित, प्रभावकारी र सेवाग्राहीमैत्री बनाउन महत्त्वपूर्ण कदम चालेको छ। मन्त्रालयले देशभर सञ्चालनमा रहेका सम्पूर्ण एम्बुलेन्स र शववाहनको अद्यावधिक विवरण अनिवार्य रुपमा उपलब्ध गराउन सम्बन्धित सेवा प्रदायक संस्थाहरूलाई निर्देशन दिएको छ।
आज एक सूचना जारी गर्दै मन्त्रालयले यसलाई एकीकृत प्रणालीमार्फत सुदृढ गर्न आवश्यक रहेको भन्दै विवरण माग गरेको हो। सेवा प्रदायक संस्थाहरूले यही मङ्सिर २१ गतेभित्र अनिवार्य रुपमा मन्त्रालयको तोकिएको इमेल ठेगानामा एम्बुलेन्स र शववाहनको सम्पूर्ण विवरण उपलब्ध गराउनुपर्नेछ।
मन्त्रालयको उद्देश्य के हो?
मन्त्रालयले जारी गरेको सूचनामा उल्लेख भएअनुसार, यो कदम चाल्नुको मुख्य उद्देश्यहरू निम्न छन्:
-
प्रभावकारी र व्यवस्थित सेवा: एम्बुलेन्स तथा शववाहन सेवालाई नागरिकका लागि छिटो, छरितो र व्यवस्थित बनाउने।
-
मितव्ययी र सेवाग्राहीमैत्री: सेवाको लागतलाई पारदर्शी बनाउँदै नागरिकमैत्री बनाउने।
-
एकीकृत प्रणालीको सुदृढीकरण: हाल सञ्चालनमा रहेका सवारी साधनहरूको सही तथ्याङ्क राखेर आवश्यकता अनुसारको प्रणालीगत विकास गर्ने।
मन्त्रालयको यो निर्देशनले देशभर सञ्चालित स्वास्थ्य सेवाका सवारीसाधनहरूको तथ्याङ्क अद्यावधिक भई आगामी दिनमा यसको व्यवस्थापन तथा अनुगमनमा सहयोग पुग्ने अपेक्षा गरिएको छ। हाल एम्बुलेन्स सेवा निर्देशिका, २०८२ र शववाहन सेवा सञ्चालन तथा व्यवस्थापन निर्देशिका, २०७७ कार्यान्वयनमा छ ।
-1793514539.jpeg)
-1784798541.jpg)
