काठमाडौँ । गर्मीयाम सुरु भएसँगै सर्पदंशका बिरामीको सङ्ख्या बढ्न थालेको छ । काठमाडौँस्थित शुक्रराज ट्रपिकल तथा सरुवा रोग अस्पताल मा उपचारका लागि आउने सर्पले टोकेका बिरामीको चाप बढेको अस्पतालले जनाएको छ ।
अस्पतालका अनुसार पछिल्लो समय तराईदेखि पहाडी जिल्लासम्मबाट सर्पदंशका बिरामी उपचारका लागि आउने गरेका छन् । गर्मी र वर्षायाममा सर्पहरू दुलोबाट बाहिर निस्कने भएकाले मानिससँगको सम्पर्क बढ्दा टोक्ने घटना बढ्ने चिकित्सकहरू बताउँछन् ।
नेपालमा गोमन, करेतलगायत विषालु सर्पको टोकाइबाट गम्भीर समस्या देखिने गरेको छ । सर्पले टोकेपछि समयमै उपचार नपाउँदा ज्यानसमेत जोखिममा पर्न सक्ने भएकाले तुरुन्त स्वास्थ्य संस्था जानुपर्ने विज्ञहरूको सुझाव छ । सर्पले टोकेको अवस्थामा घाउ काट्ने, चुस्ने, कसेर बाँध्ने वा घरेलु उपचार गर्ने काम नगर्न चिकित्सकहरूले आग्रह गरेका छन् । डसेको भागलाई स्थिर राखेर बिरामीलाई सकेसम्म छिटो अस्पताल पुर्याउनुपर्ने उनीहरूको भनाइ छ ।
सर्पदंशबाट बच्न राति हिँड्दा टर्च प्रयोग गर्ने, जुत्ता लगाउने, घर वरिपरिको झारपात सफा राख्ने, दाउरा तथा सामानको थुप्रोमा हात हाल्दा सावधानी अपनाउने र सुत्नुअघि ओछ्यान जाँच गर्ने जस्ता उपाय अपनाउन स्वास्थ्यकर्मीहरूले सुझाव दिएका छन् ।
-1793514539.jpeg)
-1784798541.jpg)
