काठमाडौं । देशका पश्चिमी तराई क्षेत्रमा तातो हावाको लहर (हिटवेभ) को प्रभाव कायमै रहेकाले स्वास्थ्यमा विशेष सतर्कता अपनाउन विज्ञहरूले सुझाव दिएका छन्। जल तथा मौसम विज्ञान विभागका अनुसार सुदूरपश्चिम र लुम्बिनी प्रदेशका तराई क्षेत्रमा अत्यधिक गर्मीको सम्भावना रहेको छ।
बढ्दो तापक्रमका कारण लु लाग्ने, शरीरमा पानीको कमी (डिहाइड्रेसन), थकान, टाउको दुख्ने, चक्कर आउने तथा बेहोस हुने जस्ता समस्या बढ्न सक्ने स्वास्थ्यकर्मीहरूले बताएका छन्। विशेषगरी बालबालिका, ज्येष्ठ नागरिक, गर्भवती महिला तथा दीर्घरोग भएका व्यक्ति गर्मीबाट बढी जोखिममा पर्ने जनाइएको छ।
मौसम पूर्वानुमानअनुसार धनगढी र नेपालगञ्ज क्षेत्रमा तापक्रम ४० डिग्री सेल्सियस आसपास पुग्ने सम्भावना छ। अत्यधिक गर्मीका कारण काम गर्ने मजदुर, खुला ठाउँमा बस्ने तथा घाममा लामो समय बिताउने व्यक्तिहरूमा स्वास्थ्य समस्या देखिन सक्ने चिकित्सकहरू बताउँछन्।
स्वास्थ्य विज्ञहरूले गर्मीमा दिउँसोको समयमा अनावश्यक बाहिर ननिस्कन, प्रशस्त पानी तथा झोलिलो पदार्थ सेवन गर्न, हल्का कपडा लगाउन र शरीरमा पानीको कमी हुन नदिन सुझाव दिएका छन्। बालबालिकामा ज्वरो, कमजोरी, पिसाब कम हुनु, अत्यधिक रोइरहनु वा सुस्त देखिए तत्काल स्वास्थ्यकर्मीको सल्लाह लिन आग्रह गरिएको छ।
-1782287006.jpg)
