वीरगञ्ज । नारायणी अस्पतालमा बिरामीको मृत्यु, त्यसपछि चिकित्सकमाथि भएको आक्रमण र अन्ततः उपचारमा संलग्न पाँच स्वास्थ्यकर्मीलाई जिम्मेवारीबाट हटाउने निर्णयले नेपालको स्वास्थ्य प्रणालीमा दुई गम्भीर प्रश्न एकैसाथ उठाएको छ - उपचारमा भएको लापरबाहीको निष्पक्ष छानबिन कसरी हुन्छ ? र अस्पतालमा स्वास्थ्यकर्मीको सुरक्षा कसरी सुनिश्चित हुन्छ ?
शनिबार उपचारका क्रममा बिरामीको मृत्यु भएपछि आक्रोशित आफन्तले आकस्मिक कक्षमा तोडफोड गर्नुका साथै उपचारमा संलग्न चिकित्सकमाथि हातपात गरेका थिए। घटनापछि अस्पताल प्रशासन, जिल्ला प्रशासन, सुरक्षा निकाय र मृतक पक्षबीच भएको छलफलले सात सदस्यीय छानबिन समिति गठन गरेको छ। समितिलाई सात दिनभित्र प्रतिवेदन बुझाउने जिम्मेवारी दिइएको छ।
छानबिनलाई प्रभावित हुन नदिन आकस्मिक कक्षमा कार्यरत दुई चिकित्सकसहित पाँच स्वास्थ्यकर्मीलाई अस्थायी रूपमा जिम्मेवारीबाट अलग गरिएको अस्पतालले जनाएको छ। प्रशासनका अनुसार यो निर्णय कसैलाई दोषी ठहर गर्न नभई अनुसन्धान निष्पक्ष बनाउन गरिएको हो।
घटनापछि चिकित्सक संगठनहरूले अस्पतालभित्र स्वास्थ्यकर्मीमाथि हुने आक्रमणले सेवा प्रवाहमै असर पर्ने चेतावनी दिएका छन्। उनीहरूले दोषीमाथि कानुनी कारबाहीसँगै स्वास्थ्य संस्थामा सुरक्षित कार्य वातावरण सुनिश्चित गर्न सरकारसँग माग गरेका छन्।
यता मृतकका आफन्तले भने उपचार प्रक्रियाको निष्पक्ष छानबिन र सत्यतथ्य सार्वजनिक हुनुपर्ने माग दोहोर्याएका छन्। यस घटनाले स्वास्थ्य सेवा दिने र सेवा लिने दुवै पक्षको विश्वास जोगाउन पारदर्शी अनुसन्धान र कानुनी प्रक्रियाको आवश्यकता झनै स्पष्ट बनाएको छ।
-1793514539.jpeg)
-1784798541.jpg)
