काठमाडौँ । नेपाल चिकित्सक संघ ९एनएमए० को नयाँ नेतृत्व चयनका लागि सम्पन्न निर्वाचनमा देशभरबाट कुल ७ हजार १०१ मत खसेको छ । करिब १६ हजार १०० मतदाता रहेको संघमा यसपटक झण्डै आधा चिकित्सकको सहभागिता देखिएको छ, जसलाई विश्लेषकहरूले “उल्लेख्य तर अझै बढाउनुपर्ने” उपस्थितिका रूपमा हेरेका छन्।
संघका अनुसार वैशाख ४ र ५ गते उपत्यकाबाहिर सम्पन्न मतदानमा ४ हजार २४४ मत खसेको थियो भने काठमाडौंमा वैशाख १८ र १९ गते भएको मतदानमा २ हजार ८५८ मत खसेको हो । देशभरका चिकित्सकहरू प्रत्यक्ष रूपमा सहभागी भएको यो निर्वाचनले संघभित्रको सक्रियता र चासो दुवै देखाएको छ।
यसपटकको निर्वाचनमा तीन प्रमुख समूहबीच त्रिपक्षीय प्रतिस्पर्धा देखिएको छ । ‘टिम मंगल’बाट डा। मङ्गल रावल, ‘टिम बद्री’बाट डा. बद्री रिजाल र ‘टिम रिफर्म’बाट डा. नारायण प्रसाद भुसाल अध्यक्ष पदका मुख्य दाबेदारका रूपमा मैदानमा उत्रिएका छन्। प्यानल भोट पूर्ण रूपमा नखसेको संकेत देखिँदा प्रतिस्पर्धा अझ खुला र अनिश्चित बनेको छ।
हालसम्म ५९८ मत गणना हुँदा अध्यक्षमा डा. रावल ३०५ मतसहित अग्रस्थानमा छन् भने डा. रिजाल २३६ मतका साथ पछ्याइरहेका छन् . डा भुसाल ५४ मतका साथ तेस्रो छन् । वरिष्ठ उपाध्यक्ष, महासचिव तथा प्रदेश उपाध्यक्षजस्ता महत्वपूर्ण पदहरूमा पनि मतान्तर निकै न्यून रहँदा परिणाम अन्तिमसम्म रोचक रहने संकेत छ।
वरिष्ठ उपाध्यक्ष पदमा डा. सञ्जीव तिवारी २५५ मतसहित अग्रस्थानमा छन् भने डा. कीर्तिपाल सुवेदी २२३ मतका साथ दोस्रो र डा. अजयकुमार मिश्र ८८ मतसहित तेस्रो स्थानमा छन्। महासचिव पदमा डा. विश्वराज दवाडी २२८ मतसहित अगाडि छन् भने डा. कालुसिंह खत्री २१२ मतका साथ नजिकै पछ्याइरहेका छन्। डा. अमृत भुसाल १३८ मतसहित तेस्रो स्थानमा छन्, जसले यस पदमा पनि कडा प्रतिस्पर्धा कायम रहेको देखाउँछ।
सह–महासचिवमा डा. हुलास अग्रवालले ३३३ भन्दा बढी मतसहित स्पष्ट अग्रता बनाएका छन् भने सह–कोषाध्यक्षमा डा. तेज्सु सिंह मल्ल पनि अगाडि देखिएका छन्। सदस्य पदतर्फ भने शीर्ष ६ भित्र अट्नका लागि कडा प्रतिस्पर्धा चलिरहेको छ, जहाँ उम्मेदवारहरूबीच मतान्तर निकै कम छ।
यस निर्वाचनलाई चिकित्सक समुदायभित्र प्रतिष्ठा, नीति र प्रभावको प्रतिस्पर्धाका रूपमा लिइन्छ। एनएमएले चिकित्सकको पेशागत अधिकार रक्षा, स्वास्थ्य नीति निर्माणमा प्रभाव, सरकारसँग समन्वय तथा स्वास्थ्य क्षेत्रका आन्दोलनमा नेतृत्वदायी भूमिका खेल्दै आएको छ, जसका कारण यसपटकको चुनावलाई विशेष महत्वका साथ हेरिएको छ। विशेषगरी यसपटकको निर्वाचनमा युवा चिकित्सकहरूको सक्रिय सहभागिता, सामाजिक सञ्जालमार्फत गरिएको डिजिटल प्रचारप्रसार, तथा स्वास्थ्य प्रणाली सुधार, पारदर्शिता र पेशागत सुरक्षा जस्ता एजेन्डाले चुनावी बहसलाई थप तीव्र बनाएको थियो।
प्रारम्भिक नतिजाले कुनै पनि समूहको एकतर्फी वर्चस्व नभएको स्पष्ट संकेत दिएको छ। अन्तिम परिणामले आगामी कार्यकालका लागि नेतृत्वको टुंगो मात्र लगाउने छैन, नेपालको स्वास्थ्य क्षेत्रको पेशागत राजनीति र नीतिगत दिशामा समेत महत्वपूर्ण प्रभाव पार्ने अपेक्षा गरिएको छ।
